Gen 8 | ZomZIV | STEP | Ahi hangin Pasian in Noah le amah tawh gunkuangpi sunga a omkhawm innsate le gamsate khempeuh phawk gige a, leitungah huih nungsakin tui kiam hi.

Genesis 8

1 Ahi hangin Pasian in Noah le amah tawh gunkuangpi sunga a omkhawm innsate le gamsate khempeuh phawk gige a, leitungah huih nungsakin tui kiam hi. 2 Tu-in a thukna muna tuinakte le vante a tuiciin kongpite kikhak zo a, vantung panin guah a zu nawn kei hi. 3 Leitungah damdamin tui kiam hi. Ni za le sawmnga a bei ciangin tui kiam manga, 4 a kha sagihna a ni sawm le sagihna ni-in gunkuangpi Ararat-a mualte tungah a kinga hi. 5 A kha sawmna dong tui kiamkiam a, a kha sawmna ni masa ni-in mual dawnte kimu thei hi. ^a

6 Ni sawmli khit ciangin Noah in gunkuangpi-a a bawlsa tawlet honga, 7 va-ak khat a khah leh leitunga tui a keu mateng a tung kik zel hi. 8 Tua ciangin amah in lei maitang pan tui a kiam siang ta hiam cih theih nadingin vakhu khat khah hi. 9 Ahi hangin vakhu in leitung khempeuh ah tui om lai ahi manin a tuk nading mun a mu kei hi; tua ahi manin gunkuangpi sung Noah kiangah a ciah kik hi. A mah in a khut zankhia in vakhu la a gunkuangpi sung ama kiangah a omsak kik hi. 10 Ni sagih ngak lai-a gunkuangpi pan vakhu khah leuleu hi. 11 Nitak-in vakhu a tun kik ciangin a tukkhiat thak olive teh khat a mukah tuah hi! Tua khit ciangin Noah in lei panin tui kiam ta hi, cih thei hi. 12 Ni sagih mah ngak lai-a vakhu khahkhia kik hi. Ahi hangin tua pen ama kiangah a kileh nawn kei hi. ^b

13 Noah kum zaguk le khat a phak kum masa a kha masa, ani masa pen ni-in lei panin tui a keu siang hi. Tua ciangin Noah in gunkuangpi khuhna phelkhia a, lei maitang a keu lam mu hi. 14 A kha nihna a ni sawm nih le sagihna ni-in leitung a keu siang sinsen hi.

15 Tua ciangin Pasian in Noah tungah, 16 “Nang le na zi le na tapate le a zite uh gunkuangpi panin paikhia un. 17 No tawh a omkhawm a nungta ganhingte amau nam ciat - vasate, ganhingte le leitunga a bokvak ganhingte - leitungah amaute khangin cipha-a a pung nadingin paikhiasak in,” a ci hi. ^c

18 Tua ahi ciangin Noah a tapate le a zi tawh a tapate’ zite tawh a paikhia khawm uh hi. 19 Ganhing khempeuh, leitunga a bokvak ganhing khempeuh le vasate khempeuh - leitunga a gamtang namkim - nam khat khit nam khat gunkuangpi sung pan paikhia uh hi.

20 Tua khit ciangin Noah in TOPA adingin biakna-tau khat dawh a asiang ganhingte le asiang vasate pan pawlkhat la-in a tungah meihal biakna pia hi. 21 TOPA in a gim namtui nam a, a lungsim sungah, “Mihingte a neutungin gitlohna lamah a awn kha ^{▼▼8.21 Ahikeh mipa, hangin} zongin mihingte hangin leitung ka hamsiat kik nawn kei ding hi. Ka hihsa bangin nuntakna a nei khempeuh ka susia kik nawn kei ding hi. ^e

22 “Leitung a kip laiteng
khaici vawh hun le an lak hun,
a vot le a sa,
phalbi le khuakhal
sun le zan
a bei ngei kei ding hi,” ci hi. ^f